Ahmad Abd El-Raheem عميد المنتدى
عدد المساهمات : 66 تاريخ التسجيل : 14/09/2009 الموقع : مصر أم الدنيا
| موضوع: نصائح مهمة لحبايبنا اللي في اعدادي الأحد سبتمبر 20, 2009 7:53 am | |
| السلام عليكم ورحمة الله وبركاته
ازيكم يا طلبة اعدادي يا شطار
بعد عناء حرب الثانوية العامة ومرارة انتظار النتيجة وتعب طلوع التنسيق
احمد ربنا انه كرمك ودخلت الكلية اللي بتحبها
ولو مش بتحبها بردوا احمد ربنا لانك في نعمة بيحسدك عليها ناس كتير
المهم
انا عايز اقولكم كلمتين على السريع
يمكن ينفعوكم
الكلام ده من واقع التجربة وياريت تاخدوا بيه علشان متقعوش في الغلطات اللي قبلكم وقع فيها
1- لازم تحضر كل المحاضرات حتى لو فترة اولي و الدكتور شديد ومشدد عليكم بس لازم تحضر
2- السكاشن اوعى تفوت سكشن لآنه هينفك واهميته متقلش عن اهمية المحاضرات ده كمان ممكن يكون اهم
3- بيض المحاضرات و السكاشن اول بأول و حل اللي اتحل فيهم تاني بايدك
4- الامتحانات القديمه ، خش المكتبة ودور على الامتحانات القديمة و تطلع امتحانات الدكتور بتاعك منها و تحل المسائل اللي علي كل باب اول باول متستناش لما يخلص المنهج
5- ورق الكورسات بتاعت الكمياء و الفزياء و الرياضة و الميكانيكا دول اهم 4 مواد حاول تجيبهم مقابل محاضراتك المتبيضة او تصورهم من المكتبة
6- فى السكاشن حاول تكون رزين شوية لن المعيدين مش بيحبوا الهزار الكتير
7- هتحتاج ارسطو صغير و مثلث 45 و مثلث 30-60 ، و كمان هتعوز قلم سنون نص و سبعة من عشرة ، و متنساش سنون H مش HB عشان ترسم بيها و بعدين تتقل ب الاتش بي، اخر حاجة برجل Maped screw و دة بتلاقي رجلين البرجل واصل بينهم مجري قلاوظ
8- هات مسطرة 80 سم ولو كنت ناوي تدخل عمارة يبقى اشتريها 120 أحسن بدال ما تشتري اتنين هي مش ناقصة مصاريفف
9-ركز في اعدادي من البيت للمدرج للسكشن، لتصوير الورق للبيت، و عندك يوم مع الجمعة..تبيض شغل يوم بيوم و اليوم اللي مع الجمعة تذاكرة، و الجمعة انت حر نفسك زيط زي ما يعجبك.
10- انا مش بعقدك من الكلية بس بجد و عن تجربة الدراسة فيها مش زي حقوق و تجارة ... هى مش صعبة بس عاوزة متابعة مستمرة يعنى مينفعش تركن المواد لأخر شهر فى الدراسة و ده اصلا مش بمزاجك لأن عندك ميد تيرم و ده امتحانات فى كل المواد زى نظام اعمال السنة كده و بيبقى عليه 33 % من المجموع الكلي للسنة.
11- اعرف من الناس القديمة اللى عندك فى الكلية دماغ الدكاترة بتوعك يعنى فيه ناس بتحب الدش الكتير فى الورقة بتاعة الاجابة و فيه ناس بتحب المعادلات الرياضية و الاثباتات و فيه ناس بتحب التوضيح بالرسومات .. انت بأه يا معلم تعرف الدكتور بيحب ايه و تتمرن على اسلوب الاجابة
وأهم حاجة اعدادي دي اكبر فرصة ليك تقدر تعمل فيها حاجة وتجيب تقدير اوعى تضيع الفرصة دي من ايديك
بحبكم في الله | |
|
sobhy eltayeb أستاذ ورئيس قسم
عدد المساهمات : 17 تاريخ التسجيل : 17/09/2009
| موضوع: رد: نصائح مهمة لحبايبنا اللي في اعدادي الأحد سبتمبر 27, 2009 5:27 pm | |
| كان فينك من زمان ياعم احمد فعلا نصاثح غاليه ياريت نعمل بيهاااااااا | |
|